इजरायलमा युद्धजन्य क्षति सार्वजनिक : २४ को मृत्यु, ८३८ घाइते

काठमाडौँ, इरानसँग चर्किएको द्वन्द्वपछिको परिस्थितिमा इजरायलले आफ्ना भौतिक र मानवीय क्षतिको विवरण सार्वजनिक गरेको छ। इजरायली राष्ट्रिय सार्वजनिक कूटनीति निर्देशनालयले हालै प्रकाशित गरेको तथ्यांकअनुसार, ‘राइजिङ लायन’ नाम दिइएको सैन्य अपरेशनका क्रममा देशले गम्भीर प्रभाव भोगिरहेको छ।

निर्देशनालयका अनुसार, इरान र इरानसमर्थित समूहहरूबाट ४०० भन्दा बढी मिसाइल प्रहार गरिएका छन् भने सयौँ मानव रहित हवाई सवारी (यूएभी) आक्रमण पनि पुष्टि भएको छ। यस्ता हमलाबाट ४० भन्दा बढी स्थानमा प्रत्यक्ष असर परेको जनाइएको छ।

जनधन र भौतिक क्षतिको विवरण:

• मृत्यु: २४ जना
• घाइते: ८३८ जना
• क्षतिपूर्ति दाबी: २२,९३२ वटा
  • भवनहरू: १८,८९०
  • सवारी साधन: १,८२७
  • अन्य सम्पत्ति: २,२१५

इजरायल कर प्राधिकरणले ती सबै क्षतिपूर्ति दाबीहरू प्राप्त गरिसकेको जानकारी दिएको छ।

गृह सुरक्षा कमाण्डका अनुसार युद्ध जोखिमयुक्त क्षेत्रबाट ५,००० भन्दा बढी नागरिकलाई सुरक्षित स्थानमा स्थानान्तरण गरिएको छ। युद्धका कारण प्रभावित क्षेत्रहरूमा आपतकालीन सेवा संयन्त्र पूर्णरूपमा परिचालित छन्।

इजरायली अधिकारीहरूले नागरिकहरूलाई सतर्क रहन, सरकारी निर्देशनको पालना गर्न र सुरक्षित आश्रयस्थलमा बस्न आह्वान गरेका छन्। वर्तमान अवस्थामा सुरक्षा व्यवस्था उच्च सतर्क अवस्थामा रहेको र थप क्षतिको जोखिम अझै कायम रहेको उल्लेख गरिएको छ।