सुधारको हुटहुटीले अध्यादेश ल्याएका हौँ : प्रधानमन्त्री ओली

प्रधानमन्त्री केपी शर्मा ओलीले सुधारको आवश्यकता र तात्कालिकता कारणले अध्यादेश ल्याएको स्पष्ट पारेका छन्। प्रतिनिधिसभाको पाँचौं अधिवेशनको पहिलो बैठकमा उनले संसद् नचलेको अवस्थामा अध्यादेश ल्याउने प्रक्रिया अनिवार्य भएको बताए।

उनका अनुसार, केहीले सोधेका थिए कि संसदलाई बेवास्ता गरेर किन अध्यादेश ल्याइएको हो भने, अध्यादेश ल्याउने कारण नै संसदको अधिवेशन नहुँदा सुधारको प्रक्रिया अघि बढाउनका लागि भएको हो। उनले थपे, “सुधारका लागि संसदको अधिवेशन अगाडि कुर्न नसक्ने अवस्था आएकोले अध्यादेश ल्याउनु परेको हो।”

प्रधानमन्त्री ओलीले संसदमा अध्यादेशको विरोधभन्दा पनि त्यसका गुण र दोषको आधारमा छलफल गर्नुपर्ने सुझाव दिए। उनले भने, “चाहिएमा संसदमा यसबारे चर्चा गरेर आवश्यक सुधार गर्न सकिन्छ।”

अध्यादेशको पक्षमा कुरा गर्दै उनले उल्लेख गरे कि यसका माध्यमबाट २९ वटा कानूनी सुधार गरिएको छ, जसमा आर्थिक र व्यावसायिक वातावरण सुधार, सुशासन प्रवर्द्धन, सार्वजनिक सेवा, भूमि र वन सम्बन्धी ऐन, लगायतका महत्वपूर्ण सुधारहरू समावेश छन्। ओलीले भने, “यसबाट सरकारी कार्यालयहरूमा फाइल घुमाउने प्रवृत्ति समाप्त हुनेछ र सेवाग्राहीलाई छिटो सेवा मिल्नेछ।”