चुनावअघि नयाँ दल दर्ता सम्भव : निर्वाचन आयोग

काठमाडौं, निर्वाचन आयोगले नयाँ राजनीतिक दल दर्ता गर्न चाहने पक्ष आए आयोग तयारी अवस्थामा रहेको जनाएको छ। कार्यवाहक प्रमुख निर्वाचन आयुक्त रामप्रसाद भण्डारीले कानुनअनुसार नयाँ दल दर्ताको प्रक्रिया अवरुद्ध नभएको बताउँदै आयोग आवश्यक तयारीसहित प्रस्तुत रहेको बताए।

“चुनावको मिति घोषणा भइसकेको अवस्थामा पनि दल दर्तामा कुनै रोकावट छैन,” भण्डारीले सञ्चारमाध्यम सँगको कुराकानीमा भने, “यदि दर्ता गर्न चाहने आए, आयोग त्यसका लागि पूर्ण रूपमा तयार छ।”

गृहमन्त्री ओमप्रकाश अर्यालले निर्वाचन आयोगसँगको छलफलका क्रममा नयाँ दल दर्तामा कुनै कानुनी अवरोध भए समाधान गर्न सुझाव दिएका थिए। “के दल दर्तामा समस्या छ भनेर जाँच गरौं भनेको हो,” मन्त्री अर्यालले भने, “तर आयोगबाट समस्या नरहेको जानकारी आएको छ। यद्यपि, प्रक्रिया र समयसीमा स्पष्ट गर्नु जरुरी छ।”

उनले समयमै सूचना प्रवाह गर्न र आवश्यक परे कानुनी व्यवस्थामा अध्यादेशमार्फत संशोधन गर्न पनि सरकार तयार रहेको उल्लेख गरे। “ऐन वा निर्देशिकामा के स्पष्ट गर्नु पर्ने हो, त्यो समयमै गरौं। यस्ता विषयले चुनावमा भ्रम सिर्जना नहोस् भन्नेमा सचेत हुनुपर्छ,” मन्त्री अर्यालले भने।

सरकारले आगामी फागुन २१ गतेका लागि प्रतिनिधिसभा निर्वाचनको मिति घोषणा गरिसकेको छ। सो निर्वाचनका लागि मतदाता नामावली अद्यावधिक गर्न अध्यादेश ल्याउने तयारीमा समेत सरकार रहेको गृहमन्त्री अर्यालले जानकारी दिएका छन्। जेनजी समूहको नामावलीमा छुट हुने सम्भावना औंल्याउँदै उनले सबै नागरिकको सहभागिता सुनिश्चित गर्न कानुनी मार्ग अपनाइने बताए।