विराटनगरमा नगरव्यापी समावेशी सरसफाइ सम्बन्धी सरोकारवाला बीच गहन छलफल

विराटनगर ,— नगरव्यापी समावेशी सरसफाइ अवधारणाका बिषयमा संयुक्त राष्ट्रसंघीय मानव बसोबास कार्यक्रम (UN- Habitat ) ले विराटनगर महानगरपालिका सँग छलफल गरेको छ । छलफलमा यु.एन.ह्याबिट्याटका CWIS प्राविधिक अधिकृत राजेश मानन्धरले विराटनगर महानगरपालिकाका उप–प्रमुख शिल्पा निरौला कार्कीसँग महानगरपालिका भित्रको सरसफाइको अवस्थाका बिषयमा जानकारी लिनु भएको थियो।
महानगरपालिकाका उप–प्रमुख कार्कीले नगरलाई सफा, सुन्दर र स्वच्छ राख्न ६४ सय घरधुरीलाई लक्षित गर्दै फोहोरपानी प्रशोधन केन्द्र सञ्चालनमा ल्याइएको जानकारी गराउनुभयो । जस अन्तर्गत हालसम्म करिब २ हजार ३०० घरधुरले सेवा लिईरहेका छन् ।

साथै सरसफाइ नीतिलाई स्थानीय स्तरसम्म पु¥याउन महानगरले जनचेतनामूलक कार्यक्रमहरू पनि सञ्चालन गरिरहेको र नागरिकको सहभागिताबाट यो प्रयासलाई थप प्रभावकारी बनाउने प्रतिबद्धता व्यक्त गर्नुभयो ।
महानगरपालिका भित्रका सबै वर्ग र समुदायलाई समेट्ने दिगो, सुरक्षित र समावेशी सरसफाइ सेवा प्रणालीका बिषयमा छलफल केन्द्रित थियो ।
कार्यक्रममा यु.एन.ह्याबिट्याटका CWIS प्राविधिक अधिकृत राजेश मानन्धरले नगरव्यापी समावेशी सरसफाइ अवधारणा र यसको सिद्धान्तहरुबारे प्रष्ट पार्नुभयो । उहाँले मानव मलमूत्र व्यवस्थापनको बिषयमा अनुसन्धान तथा प्रविधि विकासमा युएन ह्याबिट्याटको योगदान रहने बताउनुभयो । उहाँले शौचालयको सेप्टिक ट्याङ्कीहरूको अनुगमन र सेवा प्रवाह प्रभावकारी बनाउन मोबाइल एप्लिकेसन विकासको तयारी भइरहेको पनि जानकारी गराउनुभयो।

छलफलपछि सहभागी प्रतिनिधिहरूले महानगरपालिकाले सञ्चालनमा ल्याएको फोहोर प्रशोधन तथा ढल व्यवस्थापन केन्द्रको स्थलगत अवलोकन गरेका थिए । सो अवसरमा प्रशोधन केन्द्रको संरचना, कार्यप्रणाली, उपलब्धि तथा देखिएका चुनौतीबारे विस्तृत जानकारी लिइएको थियो । सहभागीहरूले यस्ता पूर्वाधारहरूले नगरको समग्र सरसफाइ सुधारमा महत्वपूर्ण योगदान गर्ने विश्वास व्यक्त गरे।