सूचना प्रविधि विकासका लागि तीन तह सरकारबीच सहकार्य अनिवार्य : मन्त्री गुरुङ

काठमाडौँ — सञ्चार तथा सूचना प्रविधि मन्त्री पृथ्वीसुब्बा गुरुङले सूचना प्रविधि क्षेत्रमा विकासका लागि केन्द्रीय, प्रदेश र स्थानीय तहका सरकारबीच सहकार्य आवश्यक रहेको बताएका छन्।

उनले डिजिटल प्रविधिको विकास स्थानीय तहसम्म प्रभावकारी रूपमा पुर्‍याउनुपर्नेमा जोड दिँदै राष्ट्रिय सूचना तथा सञ्चार प्रविधि दिवस–२०८२ को समीक्षा तथा प्रशंसा–पत्र वितरण कार्यक्रममा आइटी दिवसलाई उत्सवको रूपमा मनाउनुपर्ने र युवा पुस्तालाई प्रोत्साहन गर्ने कार्यक्रमहरू ल्याउनुपर्ने बताए।

मन्त्री गुरुङले भने, “यो दिवस देशभर उत्सवको रूपमा मनाउनुपर्छ र नयाँ प्रतिभा उत्पन्न गर्न थप गतिविधिहरू आवश्यक छन्।”

सरकारका प्रवक्ता समेत रहेका गुरुङले डिजिटल नेपाल फ्रेमवर्क (डिएनएफ) को मस्यौदा अहिले अन्तिम चरणमा पुगेको उल्लेख गर्दै सूचना प्रविधि क्षेत्रको विकासका लागि आवश्यक पूर्वाधार निर्माणमा सरकार तयार रहेको बताए। साथै, यसका लागि निजी क्षेत्रको सहकार्य महत्वपूर्ण रहेको बताए।

मन्त्रालयकी सचिव राधिका अर्यालले पनि युवा प्रोत्साहनका लागि आइटी इन्टर्नसिपका लागि बजेट छुट्याइएको जानकारी दिइन्।

कार्यक्रममा सहभागी सरोकारवालाहरूले प्रदेश र स्थानीय तहसँगको सहकार्यमा सूचना प्रविधि क्षेत्रमा थप विकास गर्न सुझाव दिएका थिए।

यसरी तीन तहको सरकारबीच सहकार्य र निजी क्षेत्रको सक्रियताले नेपालमा सूचना प्रविधि क्षेत्रको समग्र प्रगति सुनिश्चित गर्न सकिने विश्वास व्यक्त गरिएको छ।