शारदा नगरपालिकामा मानव मलमूत्र व्यवस्थापन सुधारका लागि व्यापक तयारी सुरु

सल्यान — शारदा नगरपालिकाले मानवजन्य मलमूत्र (दिसा–पिसाब) व्यवस्थापनमा भविष्यमा देखिन सक्ने समस्याको पूर्व तयारी थालेको छ। नगरपालिकाले ‘नगरव्यापी समावेशी सरसफाइ सेवा प्रणालीहरूको विस्तार कार्यक्रम’ अन्तर्गत युएन ह्याबिट्याटसँग सहकार्य गरी मानव मलमूत्र व्यवस्थापनमा ठोस रणनीति तयार गर्ने उद्देश्य राखेको हो।

शारदा नगरपालिकाका उपप्रमुख सुस्मिता सापकोटाले जानकारी दिँदै बताइन् कि हालसम्म शौचालयका सेप्टिक ट्याङ्क भरिएका भए पनि ठूला समस्या देखिएको छैन, तर निकट भविष्यमा शहरीकरण बढ्दै जाने र जनसंख्या बढ्ने क्रममा चुनौतीहरू देखिन सक्ने भएकाले आवश्यक नीतिगत र कानुनी संरचना तयार भइसकेको छ। “अहिले तत्काल समस्या छैन, तर भविष्यमा आउन सक्ने जोखिमलाई ध्यानमा राख्दै नगरपालिकाले आवश्यक नीति र कानुनी संरचना निर्माण गरिसकेको छ,” उनले थपिन्।

नगरपालिकाका प्रमुख प्रशासकीय अधिकृत ओमप्रकाश देवकोटाले भने कि मानव मलमूत्र प्रशोधन केन्द्र र गुणस्तरीय सेप्टिक ट्याङ्क निर्माणका प्राविधिक पक्ष अध्ययन गरी आवश्यक परिमार्जनहरू गरिनेछन्। यसले दीर्घकालीन रूपमा शारदा नगरपालिकामा प्रभावकारी मलमूत्र व्यवस्थापन सुनिश्चित गर्ने लक्ष्य राखेको छ।

छलफलमा युएन ह्याबिट्याटका प्रतिनिधि राजेश मानन्धर, भिन्तुना श्रेष्ठ र वाटरएड नेपालका वरिष्ठ वास नीति सल्लाहकार गोविन्द श्रेष्ठले पनि गुणस्तरीय सेप्टिक ट्याङ्क निर्माण र प्रभावकारी नियमनले भविष्यमा देखिन सक्ने समस्या न्यूनीकरण गर्न सक्ने बताएका थिए।

यस कार्यक्रमको शुरुवात असार १४ गते युएन ह्याबिट्याट, नेपाल नगरपालिका संघ, वाटरएड नेपाल र सात वटा नगरपालिकाबीच गरिएको बहुपक्षीय सम्झौताअनुसार भएको हो। कर्णाली प्रदेशबाट शारदा नगरपालिका यस कार्यक्रममा समावेश गरिएको छ।

कार्यक्रम अन्तर्गत शारदा नगरपालिकामा मानव मलमूत्र व्यवस्थापनका लागि कानुनी औजार निर्माण, तथ्याङ्क संकलन तथा अद्यावधिक, कार्यसम्पादन सूचक र मानक तय, जनशक्ति क्षमता अभिवृद्धि र सम्बन्धित कर्मचारीहरूको तालिम सञ्चालन गरिनेछ। तालिम वाटरएड नेपाल, खानेपानी तथा ढल व्यवस्थापन विभाग र सम्बन्धित मन्त्रालयमार्फत दिइनेछ।

विशेषज्ञहरूले यस कार्यक्रमको माध्यमबाट शारदा नगरपालिकामा दीर्घकालीन मानवजन्य मलमूत्र व्यवस्थापन, पूर्वाधार सुदृढीकरण र वातावरणीय सुरक्षा सुनिश्चित गर्न ठोस आधार तयार हुने विश्वास व्यक्त गरेका छन्।