संयुक्त राष्ट्रसंघमा उठाइने विषयबारे प्रधानमन्त्री शाहले कांग्रेस नेतासँग लिए सुझाव

काठमाडौं — प्रधानमन्त्री बालेन शाहले संयुक्त राष्ट्रसंघ (यूएन) महासभामा सहभागी हुन अमेरिका प्रस्थान गर्नुअघि नेपाली कांग्रेसका शीर्ष नेताहरूसँग छलफल गरेका छन्।

प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार भएको भेटमा कांग्रेस उपसभापति विश्वप्रकाश शर्मा र संसदीय दलका नेता भीष्मराज आङ्देम्बेको सहभागिता थियो।

प्रधानमन्त्रीको सचिवालयका अनुसार महासभामा नेपालका तर्फबाट उठाइने विषय तथा राष्ट्रिय सरोकारका मुद्दाबारे सुझाव लिन प्रमुख प्रतिपक्षी दलका प्रतिनिधिसँग छलफल गरिएको हो।

भेटपछि कांग्रेस उपसभापति शर्माले महासभामा प्रधानमन्त्रीले उठाउनुपर्ने विषयबारे पार्टीको धारणा प्रस्तुत गरिएको बताए। उनका अनुसार पार्टी सभापति गगन थापा तथा कांग्रेसको समग्र धारणा प्रधानमन्त्रीसमक्ष राखिएको थियो।

शर्माले अन्तर्राष्ट्रिय मञ्चमा प्रधानमन्त्रीले नेपालको साझा आवाज प्रस्तुत गर्नुपर्ने धारणा राख्दै भोटेकोशी क्षेत्रमा भएको विपद्लाई समेत अन्तर्राष्ट्रिय समुदायको ध्यानाकर्षण गराउनुपर्ने बताए।

उनका अनुसार भोटेकोशीको विपद्बारे अमेरिकी पक्षसँग संवाद गर्दा त्यहाँको मानवीय अवस्थालाई प्रभावकारी रूपमा प्रस्तुत गर्न आवश्यक छ। उनले नेपालमा भएको विपद्को पीडालाई अमेरिकाको टेक्ससमा देखिएको विपद्को अनुभवसँग जोडेर मानवीय संवेदनाको पक्षबाट विषय उठाउन सकिने धारणा पनि व्यक्त गरे।

प्रधानमन्त्री शाह मंगलबार अपराह्न संयुक्त राष्ट्रसंघको महासभामा सहभागी हुन संयुक्त राज्य अमेरिका प्रस्थान गर्ने कार्यक्रम रहेको छ।