कार्यकर्तालाई ओलीको सन्देश : ‘म बीचमै पार्टी छोडेर जानेवाला छैन’

काठमाडौं, जेठ २० — केपी शर्मा ओली ले पार्टी नेतृत्वबाट तत्काल पछि हट्ने कुनै योजना नरहेको स्पष्ट गरेका छन्।

काठमाडौंमा आयोजित एक कार्यक्रममा सम्बोधन गर्दै ओलीले चुनौतीपूर्ण परिस्थितिमा जिम्मेवारी त्याग्ने उद्देश्यले आफू अध्यक्ष नबनेको बताएका हुन्। अनुकूल अवस्था हुँदा मात्रै नेतृत्व गर्ने र कठिनाइ आउँदा जिम्मेवारीबाट पन्छिने प्रवृत्ति आफ्नो नभएको उनको भनाइ थियो।

ओलीले पार्टीलाई सफलताको दिशामा अघि बढाएर मात्र विश्राम लिने बताएका छन्। नेतृत्व परिवर्तन पार्टीको विधि, विधान र निर्धारित प्रक्रियाअनुसार हुने उल्लेख गर्दै उनले आफूले बीचमै जिम्मेवारी छोडेर जाने आशंका नगर्न कार्यकर्तालाई आग्रह गरे।

पार्टीलाई थप सुदृढ बनाउँदै वर्तमान चुनौतीहरूको सामना गरेर सफलता हासिल गराउने आफ्नो प्रतिबद्धता कायम रहेको उनले दोहोर्‍याए। आवश्यक प्रक्रिया पूरा भएपछि मात्रै नेतृत्व हस्तान्तरणबारे सोच्ने संकेत पनि उनले दिए।

ओलीले पछिल्लो समय व्यक्तिगत र पारिवारिक कारणले राजनीतिक गतिविधिमा केही व्यवधान आएको स्वीकार गर्दै अब पार्टीका नेता–कार्यकर्तासँगको भेटघाट र संवादलाई थप सक्रिय बनाउने बताए। पितृशोक, गिरफ्तारी र शल्यक्रियाजस्ता घटनाले केही समय राजनीतिक गतिविधिमा असर परे पनि अब पुनः सक्रिय रूपमा अघि बढ्ने उनको भनाइ थियो।