अब खेलाडीहरू खेलबाटै जीविकोपार्जन गर्न सक्ने अवस्थामा पुगेका छन् : प्रधानमन्त्री ओली

काठमाडौं, – प्रधानमन्त्री केपी शर्मा ओलीले वर्तमान सरकारले खेलकुद क्षेत्रमा आवश्यक ध्यान दिएको दाबी गर्दै अब नेपाली खेलाडीहरू खेलमार्फतै जीविकोपार्जन गर्न सक्ने अवस्थामा पुगेको बताएका छन्।

बुधबार आयोजित एक कार्यक्रममा, जहाँ विभिन्न अन्तर्राष्ट्रिय प्रतियोगितामा पदक विजेता खेलाडीहरूलाई सम्मान र पुरस्कार प्रदान गरिएको थियो, प्रधानमन्त्री ओलीले विगतमा खेलमै पूर्णरूपमा समर्पित हुन कठिन भएको अवस्थामा अहिले त्यस्तो अवसर र वातावरण बनेको बताएका हुन्।

उनले भने, “हामीले खेललाई अघि बढाउन थालेको धेरै समय भएको छैन। अन्य देशहरूले पहिल्यैदेखि संगठितरूपमा खेललाई अगाडि बढाएका थिए, तर हामीकहाँ त्यसो भएको थिएन। अहिले सरकारको पनि ध्यान केन्द्रित भएको छ र अब खेल व्यावसायिकरूपमा पनि सम्भव भएको छ। खेलबाट पनि जीवन चलाउन सकिन्छ भन्ने अवस्था निर्माण भएको छ।”

ओलीले हालको परिस्थितिमा समर्पित र व्यावसायिक खेलाडी बन्न सकिने वातावरण बनेको भन्दै त्यसैले नेपाली खेलाडीहरू अन्तर्राष्ट्रिय स्तरमा सफलता हात पार्न थालेको उल्लेख गरे।