२०४६ पछिका सबै नेताको सम्पत्ति छानबिन गर : राप्रपा

काठमाडौं । राष्ट्रिय प्रजातन्त्र पार्टी (राप्रपा) ले २०४६ सालपछि सत्ता र जिम्मेवारी सम्हालेका उच्च पदस्थ नेता तथा सरकारी कर्मचारीहरूको सम्पत्ति छानबिन गर्न माग गर्दै सम्पत्ति शुद्धीकरण विभाग र अख्तियार दुरुपयोग अनुसन्धान आयोगमा ज्ञापन पत्र बुझाएको छ।

शुक्रबार राप्रपाका नेताहरूले विभाग र आयोगमा छुट्टाछुट्टै ज्ञापनपत्र बुझाउँदै विगत तीन दशकभन्दा बढी समयदेखि भएका सम्पत्ति संकलनका स्रोत, भ्रष्टाचारका प्रकरण र त्यसमा संलग्न व्यक्तिहरूको विस्तृत छानबिन गरी कारबाही गर्न आग्रह गरेका हुन्।

राप्रपा प्रवक्ता मोहन श्रेष्ठका अनुसार संघ, प्रदेश र स्थानीय तह सबैमा भ्रष्टाचार मौलाउँदै गएको उल्लेख गर्दै पार्टीले निष्पक्ष छानबिनको माग गरेको हो।

‘आजको अवस्था यस्तो छ जहाँ भ्रष्टाचार कहाँ छ भन्ने खोज्नुपर्दैन, बरु कहाँ छैन भनेर खोज्नुपर्ने परिस्थिति बनेको छ,’ राप्रपाले अख्तियारलाई बुझाएको ज्ञापनपत्रमा उल्लेख गरिएको छ।

राप्रपाले सम्पत्ति शुद्धीकरण तथा भ्रष्टाचारविरुद्धको अभियानलाई संस्थागत रूपमा अगाडि बढाउनसमेत आग्रह गरेको छ।