राष्ट्रिय लिग : एपीएफले संकटालाई २–१ ले पराजित गर्दै जित कायम

काठमाडौं – सशस्त्र प्रहरी बलको एपीएफ फुटबल क्लबले राष्ट्रिय लिगमा संकटाको टोलीविरुद्ध २–१ को संघर्षपूर्ण जित हासिल गरेको छ।

आइतबार (माघ ११) त्रिपुरेश्वरस्थित दशरथ रंगशालामा भएको खेलमा एपीएफका प्रदीप लामा र युवराज खड्काले समान एक-एक गोल गर्दै टोलीलाई जित दिलाए। संकटाका गणेश हमालले ८१औँ मिनेटमा एक गोल फर्काए पनि आफ्नो टोलीको हार टार्न सकेनन्।

खेलको २९औँ मिनेटमा प्रदीप लामाले एपीएफलाई अग्रता दिलाएका थिए भने ५१औँ मिनेटमा युवराज खड्काले अग्रतालाई दोब्बर बनाए।

जितसँगै एपीएफले लिगमा नौ अंक जोडेको छ। तीन खेलमा शतप्रतिशत जित निकाल्दै टोली शीर्ष स्थानमा उभिएको छ। पराजित संकटाको अंक पाँचमै सीमित छ।